पटवारी जी , हे अमीन ,
करा त जरा ईं छाण-बीन ।
दिल्ली बम्बई वाला किलै ?
उत्तराखंड मा लेणा ज़मीन ।१।
पटवारी जी , हे अमीन
करा त जरा ईं छाण-बीन ।।
नदी जंगल पहाड़ पाखा ,
दलालों न मारया डाका ।
कैन बीस नाली अगेंटी ,
कैन खैंची बीघा तीन ।२।
दिल्ली बम्बई वाला किलै ?
उत्तराखंड मा लेणा ज़मीन ।
कुछ खरीदणा लालच मा
कुछ व्यापार की हालत मा
कुछ न कुंडली मारी याली
कुछन लेण गरीबू की छीन ।३।
दिल्ली बम्बई वाला किलै ?
उत्तराखंड मा लैणा ज़मीन ।
उंड फंड का चुल्हा फंड ,
चुल्हा फंड का उंड फंड ।
मूल निवासी बण्या प्रवासी
प्रवासी ह्वै यख आसीन ।४।
दिल्ली बम्बई वाला किलै ?
उत्तराखंड मा लैणा ज़मीन ।
घाटी बुग्याल लूछी याली ,
गंगा किनारा डेरा डाली ।
झील झरना कब्जा त्युकां
फार्म हाउस का त्यु शौक़ीन ।५।
दिल्ली बम्बई वाला किलै ?
उत्तराखंड मा लैणा ज़मीन ।
बणू बणू का डाला झांगी ,
धरती करयाली हमारी नांगी ,
प्रजा यख की सुनिंद पड़ीं ,
राजा बजौणा अपणी बीन ।६।
दिल्ली बम्बई वाला किलै ?
उत्तराखंड मा लैणा ज़मीन ।
पहाड़ कू पाणी पहाड़ ज्वानी
ठंडी मीठी स्वाणी स्वाणी ,
आधा पलायन की भेंट चढ़ी ,
आधा दारू मासू मा लीन ।७।
दिल्ली बम्बई वाला किलै ?
उत्तराखंड मा लैणा ज़मीन ।
हे मोदी जी , हे धामी जी ,
देश प्रदेश का स्वामी जी ।
ये भू कानून बणौण मा
बस आप दूया ही छै प्रवीन ।८।
दिल्ली बम्बई वाला किलै ?
उत्तराखंड मा लैणा ज़मीन ।
भूकानून के समर्थक शेयर अवश्य किजिएगा
( धर्मेंद्र उनियाल’धर्मी ‘)
